Egidiuslied
Mi lanct na di, gheselle mijn.
Du coors die doot, du liets mi tleven!
Dat was gheselschap goed ende fijn,
Het sceen teen moeste ghestorven sijn
Nu bestu in den troon verheven,
Claerre dan der zonnen scijn:
Alle vruecht es di ghegheven.
Egidius, waer bestu bleven?
Mi lanct na di, gheselle mijn.
Du coors die doot, du liets mi tleven!
Nu bidt vor mi, ic moet noch sneven
Ende in den werelt liden pijn.
Verware mijn stede di beneven!
Ic moet noch zinghen een liedekijn;
nochtan moet emmer ghestorven sijn.
Egidius, waer bestu bleven?
Mi lanct na di, gheselle mijn.
Du coors die doot, du liets mi tleven!
Anoniem uit het Gruythuyse Handschrift
(Middeleeuws dagboek van de liefde,
1995, Fox Editions)
